Berisha: Pakistani mund të luajë një rol të rëndësishëm me njohjen e Kosovës

Stamboll, 31 tetor - Kryeministri shqiptar Sali Berisha i bëri thirrje Pakistanit që të njohë pavarësinë e Kosovës, si dhe të inkurajojë edhe vendet mike. Kryeministri Berisha gjatë një takimi me Kryeministrin pakistanez Syed Makhdoom Yousaf Raza Gillani Gillani, në Stamboll, ku po i zhvillon punimet Forumi Ekonomik Botëror, diskutuan edhe çështjet e zhvillimeve në rajon, duke u ndalur veçanërisht në njohjen e pavarësisë së Kosovës. Berisha u shpreh se njohja e pavarësisë së Kosovës është kusht themelor për sigurinë dhe paqen në rajon dhe se Pakistani mund të luajë një rol të rëndësishëm në njohjen e Kosovës, duke inkurajuar edhe vendet e tjera mike. Kryeministri shqiptar Berisha dhe homologu i tij turk Rexhep Erdogan po ashtu diskutuan mbi zhvillimet në rajon duke u ndalur në veçanti në rëndësinë e pavarësisë së Kosovës si kusht thelbësor për sigurinë dhe stabilitetin në rajon.