Studentët e USHT paralajmërojnë protesta

Unioni i Studentëve të Universitetit Shtetëror të Tetovës paralajmëroi protesta nëse vazhdohet me gjykimin e rasteve të Hagës.

"Hapja e padrejtë e rasteve të kthyera nga Haga nuk përputhet me normat e së drejtës ndërkombëtare si dhe me Ligjin për amnisti të nënshkruar vetë nga aktorët që i riaktualizojnë këto raste në kurriz të shqiptarëve të pafajshëm", deklaroi kryetari i Unionit studentor të USHT-së, Gadaf Uzeiri, i cili paralajmëroi edhe bllokada të përgjithshme.

"Nga këto raste, në mënyrë indirekte me gjykimin e funksionarëve, qytetarëve tjerë dhe dy deputetëve, nga pala maqedonase ekskluzivisht po gjykohet populli dhe elektorati shqiptar i cili ka zgjedhur këta ta fundit. Ngjashëm kundërshtojmë dhe sulmojmë politikën neglizhence të organeve kompetente shtetërore edhe lidhur me gjykimin e padrejtë të të akuzuarve në rastin e Brodecit", tha Uzeiri në një konferencë për shtyp.

Në Maqedoni kanë filluar proceset gjyqësore për katër rastet e kthyera nga Tribunali i Hagës, të cilët ngarkojnë ish-pjesëtarë të Ushtrisë Çlirimtare Kombëtare.