Në SHBA dënohet djali i ish presidentit të Liberisë

Uashington, 31 tetor Djali i ish presidentit liberian, Çarls Tejlor, 31 vjeçar, i cili ka nënshtetësi amerikane, është gjykuar fajtor nga një gjykatë në SHBA, për pjesëmarrje në tortura dhe ekzekutime masive. Dënimi penal do të vendoset në muajin janar. Çarls Tejlor i riu akuzohet se i ka kryer krimet gjatë sundimit të babait të tij, në postin e shefit të njësisë antiterror. Ky është procesi i parë, ku një shtetas amerikan dënohet për krime të kryera jashtë vendit. Ish presidenti liberian, Çarls Tejlor, gjykohet aktualisht në një proces për krime lufte në gjykatën e Hagës për Sierra Leonen.