Terral: EULEX-i, neutral ndaj statusit të Kosovës

Ambasadori i Francës në Beograd, Jean Francois Terral ka deklaruar se misioni EULEX mund të jetë në tërësi neutral ndaj statusit të Kosovë.

Terral ka thënë se shpreson se do të arrihet një marrëveshje për vendosjen e këtij misioni në Kosovë, me të cilën do të ishin të kënaqur Serbia, BE-ja dhe OKB-ja.

"Misioni EULEX është ideuar për t'u vendosur sundimi i ligjit në Kosovë dhe për t'u mbrojtur pakicat e rrezikuara. Ky është thelbi i tij. Është fakt se misioni përmendet në Planin e Ahtisaarit, mirëpo EULEX ka logjikë vetjake dhe absolutisht mund të ndahet nga ky plan", ka thënë Terral për mediat serbe.

Terral ka thënë se BE-ja nuk e ka ndërmend të ndërrojë definicionin e miratuar për EULEX-in, mirëpo ka shtuar se, "mund të pranojë që ky mision të jetë nën ombrellën e OKB-së dhe në kuadër të Rezolutës ekzistuese 1244".