Prioritetet e Naim Tërnavës në mandatin e ri

Tërnava: "Prioritet në mandatin e ri futja e lëndës fetare në shkolla dhe ndërtimi i Qendrës islame".


Myftiu i rizgjedhur i Kosovës, Naim Tërnava, thotë se prioritet në mandatin e ri do të jetë futja e lëndës fetare në shkollë pasi do të jetë edhe kriter për integrim në BE, si dhe ndërtimi i Qendrës islame në Prishtinë. Në një intervistë për radion Blue Sky, Myftiu Tërnava thotë se Bashkësia Islame do të vazhdojë të lobojë te vendet islamike për njohjen e pavarësisë së Kosovës ndërsa për rezultatin e dobët deri tash fajëson Qeverinë se nuk ka bërë asgjë në këtë drejtim.

Në intervistë Myftiu Tërnava flet edhe për përpjekjet që të ndërtojë marrëdhënie të mira edhe me klerin ortodoks. Ai thotë se në Kosovë nuk do të lejohen tentime të organizimit jashtë institucional të komunitetit mysliman, siç ka tentativa nga disa OJQ, për ta indoktrinuar jo vetëm komunitetin mysliman.

Edhe në këtë rrafsh ai i bënë përgjegjës institucionet e Kosovës që nuk kontrollojnë veprimtarinë e OJQ-ve të ndryshme, ka thënë mes tjerash në intervistën për Radio Blue Sky, Myftiu i rizgjedhur i Kosovës, Mr. Naim Tërnava.