Kaka refuzon Manchester City-n

Leite Kaka nuk largohet nga Milan.

Përfundon saga e super-yllit të Milan, Leite Kaka. Ai nuk e ka pranuar ofertën e majme të Manchester City dhe do t'i mbetet besnik skuadrës së Milanit. Lajmin e ka bërë të ditur në mbrëmje vetë presidenti i klubit, kryeministri italian, Silvio Berlusconi. "Jam shumë i lumtur. Ai nuk është vetëm lojtar i madh në fushë, por edhe person i ndershëm", ka thënë Berlusconi, duke treguar se Kaka i kishte thënë se paratë e ofruara nga City nuk janë të rëndësishme për të. Sipas Berlusconit Kaka është shumë i prekur nga përkrahja e jashtëzakonshme që ka marrë nga tifozët dhe nuk ka kërkuar pagë më të madhe nga klubi i tij. Edhe klubi anglez ka zyrtarizuar përfundimin e bisedimeve për transferimin e mundshëm. Manchester City, që është blerë nga sheikë arabë i kishte ofruar pagë javore prej 550 mijë eurosh yllit brazilian. Kaka është në Milan që prej vitit 2003 dhe është shpallur Lojtari më i mirë i Vitit për 2007-n nga FIFA.