Nadj: Rehn nuk i ka kërkuar Serbisë ta pranojë Kosovën

Përfaqësuesja e Rehn-it ka deklaruar se ai nuk ka thënë se Serbia duhet ta pranojë vendimin e Kosovës për të qenë e pavarur.

Përfaqësuesja e komisarit evropian për zgjerimin, Olli Rehn, Kristina Nadj, ka deklaruar se në fjalimin e tij në Varshavë, Rehn nuk ka thënë se Serbia duhet ta pranojë vendimin e Kosovës për të qenë e pavarur.

Në një njoftim dërguar gazetarëve të akredituar në Komisionin Evropian, Nadj thotë se një deklaratë e tillë nuk figuron në verzionin zyrtar të fjalimit të Rehnit.

Sipas saj, fjalimi i Rehnit dhe komunikata e Komisionit Evropian e tregojnë në mënyrë të qartë se Komisioni nuk është kompetent për të pranuar shtete.

Mediat rajonale kanë cituar agjencinë shtetërore polake, PAP sipas së cilës Rehn i ka kërkuar Serbisë që ta pranojë vendimin e Kosovës për të qenë e pavarur.