Skrapar, zbulohet 83 mijë fishekë të braktisur

Është zbuluar rastësisht një sasi prej 83 mijë fishekësh automatiku në periferi të qytezës të Çorovodës.

Burime nga komisariati i policisë të këtij qyteti kanë bërë të ditur të premten se është zbuluar në një nga depot e braktisur në periferi të qytetit një arsenal i tërë fishekësh, të cilat ende nuk dihet se si kanë përfunduar në atë objekt.

Po këto burime kanë pohuar se kanë qenë barinjtë e zonës, të cilët kanë njoftuar në komisariat për sasinë e fishekëve që ndodheshin në objektin e braktisur.

Menjëherë pas marrjes së formacionit në vendngjarje kanë mbërritur forcat blu dhe ekspertët e armatimit, të cilët më pas kanë bërë bllokimin dhe sekuestrimin e sasisë së fishekëve.

Burime ende të pa konfirmuara zyrtarisht kanë pohuar se kanë qenë rreth 90 arka me fishekë model 56 automatiku të prodhimit kinez.

Burime nga Drejtoria e Policisë së Beratit - ku përfshihet dhe Komisariati i Policisë së Skraparit - kanë bërë të putir se armatimi është prej municioneve të grabitura nga depot që në vitin 97 dhe për sa i përket vendndodhjes do të punohet për zbulimin e transportuesit të tyre.